Fy mis cyntaf fel Dylunydd Profiad Defnyddiwr yn Nhîm Digidol Llywodraeth Leol Cymru

Mae ychydig dros fis wedi bod ers i mi ddechrau fy rôl fel Dylunydd Profiad Defnyddiwr yn Nhîm Digidol Cymdeithas Llywodraeth Leol Cymru (CLlLC). Mae’r holl dîm wedi fy nghroesawu gyda breichiau agored ac maent wedi bod o gymorth mawr wrth fy niweddaru gyda’r holl waith gwych maent wedi bod yn cyflawni.

Mae wedi bod yn fis llawn cyrsiau hyfforddi, darllen llyfrau, erthyglau newyddion a chynifer o negeseuon blog Digidol Llywodraeth Leol Cymru ac y gallaf. Rwyf wedi bod yn mwynhau dysgu am ddylunio gwasanaeth digidol mewn llywodraeth leol.

Roedd fy rôl flaenorol yng Nghyngor Torfaen, ac fe helpodd hyn gan fy mod eisoes â phrofiad o lywodraeth leol. Roedd addasu i weithio mewn modd mwy strategol yn broses ddysgu gan fy mod wedi bod yn gweithio mewn rolau mwy ymarferol yn flaenorol – ond mae’n her yr wyf yn ei fwynhau.

Gellir egluro dylunio profiad defnyddiwr fel popeth sy’n effeithio ar y ffordd mae defnyddwyr yn rhyngweithio gyda chynnyrch. Mae’n cyfeirio at y teimlad mae person yn ei gael pan maent yn rhyngweithio gyda chynnyrch mewn mannau digidol a chorfforol. Wrth greu gwasanaethau digidol mae’n bwysig i Ddylunydd Profiad Defnyddiwr (fel fi) edrych ar bob cam o siwrnai’r defnyddiwr a sicrhau bod yr hyn maent yn ceisio ei gyflawni mor hawdd a syml â phosibl. Mae gwasanaethau digidol wedi cael eu defnyddio llawer mwy ac yn hanfodol ers pandemig Covid, ac nid yw’r angen wedi diflannu.

Wrth arbenigo mewn dylunio profiad defnyddiwr yn y sector cyhoeddus, un o’r ystyriaethau mwyaf pwysig yw hygyrchedd. Yn fy marn i, mae’n hollbwysig bod holl ddinasyddion yn gallu cael mynediad at wasanaethau yn hawdd ac yn gyfartal – heb unrhyw rwystrau. Rwy’n edrych ymlaen at gyfrannu tuag at ddylunio gwasanaeth ar draws Cymru gan weithio gydag egwyddorion sy’n canolbwyntio ar y defnyddwyr.

Ers dechrau, rwyf hefyd wedi cael cyfle i roi cynnig ar brofi defnyddioldeb gydag un o’n Hymchwilwyr Defnyddwyr. Roedd yn brofiad llawn gwybodaeth i weld sut mae dinasyddion yn cael mynediad ac yn defnyddio gwasanaethau ar-lein, gan mai hyn sy’n siapio pob cam o ddylunio gwasanaeth.

Mae wedi bod yn wych dysgu am yr holl waith digidol gwych sy’n digwydd mewn llywodraeth leol (yn ogystal â’r cydweithio ar draws y sector preifat ehangach) a bod cymaint o bobl wedi ymrwymo i ddarparu gwasanaethau gwych i ddinasyddion.

Rwy’n edrych ymlaen at gydweithio ymhellach gyda’r tîm Digidol Llywodraeth Leol Cymru yn ogystal â sefydliadau eraill y sector cyhoeddus a gallu mewnbynnu fy syniadau fy hun er mwyn siapio sut mae dinasyddion yn rhyngweithio ar-lein gyda’u hawdurdodau lleol drwy brofiad gwych i ddefnyddwyr.

Rwy’n dal i deimlo bod gen i gymaint i’w ddysgu – sy’n wir am unrhyw sefyllfa, gan nad oes unrhyw un yn gwybod popeth! Ond rwyf wedi dod yn bell yn barod, ac rwy’n edrych ymlaen at nifer o brosiectau sydd ar y gweill. Os hoffech sgwrs sydyn am y profiad i ddefnyddwyr, neu fywyd yn gyffredinol, mae croeso i chi gysylltu â mi trwy e-bost: chris.carter@wlga.gov.uk